நீங்கள் தேடியது "இந்திய வானிலை மையம்"

புதுடெல்லி:

காஷ்மீர், இமாச்சலப் பிரதேசம் உள்ளிட்ட வட மாநிலங்களில் கடுமையான பனிப்பொழிவும் குளிரும் நிலவுகிறது.

இதற்கிடையே இமயமலையின் மேற்கு பகுதியில் வளி மண்டலத்தில் மேலடுக்கு சுழற்சி நிலவுகிறது. இதன் காரணமாக நாளை (20-ந் தேதி) முதல் 23-ந் தேதி வரை மேற்கு இமயமலை பகுதிகளான காஷ்மீர், இமாச்சலப்பிரதேசம், உத்தரகாண்ட் மாநிலங்களில் கடும் பனிப்பொழிவுடன் மிக பலத்த மழையும் பெய்யும் என்று இந்திய வானிலை மையம் எச்சரிக்கை விடுத்துள்ளது.

துருவப் பகுதியில் இருந்து மணிக்கு 20 முதல் 30 கிலோ மீட்டர் வேகத்திலும் அதிக பட்சம் 40 கிலோ மீட்டர் வேகத்திலும் குளிர் காற்று வீசும்.

டெல்லி, ஒடிசாவில் பனிமூட்டம் அதிகரிக்கும் என்று தெரிவிக்கப்பட்டுள்ளது. வங்க கடல் பகுதியில் இருந்து வீசும் காற்று காரணமாக தமிழ்நாடு உள்பட தென் மாநிலங்களில் தற்போது நிலவும் குளிர் தொடரும் என்றும் வானிலை மையம் தெரிவித்துள்ளது. #IMD

புதுடெல்லி:

தாய்லாந்து வளைகுடாவில் புயல் உருவாகி உள்ளது. இதற்கு ‘பபுக்’ என பெயரிடப்பட்டுள்ளது.

இந்த புயலானது அந்தமான் கடல் நோக்கி 10 கி.மீ. வேகத்தில் நகர்ந்து வருகிறது. இன்று காலை அந்தமானுக்கு கிழக்கு தென்கிழக்கே 720 கி.மீ. தொலைவில் மையம் கொண்டுள்ளது. இன்று பிற்பகல் ‘பபுக்’ புயல் அந்தமான் கடலை அடைகிறது.

இந்த புயலானது மேற்கு மற்றும் வடமேற்கு திசை நோக்கி நகர்ந்து நாளை மாலை அந்தமான் கடலை அடைந்து கரையை கடக்கிறது. அப்போது மணிக்கு 70 முதல் 80 கி.மீ. வேகத்திலும் அதிகபட்சமாக 90 கி.மீ. வேகத்திலும் சூறைக்காற்றுடன் பலத்த மழை பெய்யும் என்று இந்திய வானிலை மையம் தெரிவித்துள்ளது.

புயல் அந்தமானில் கரையை கடந்த பின்பு வடக்கு மற்றும் வடமேற்கு திசையில் நகர்ந்து மியான்மர் கடற்கரை நோக்கி சென்று 7 அல்லது 8-ந்தேதி வாக்கில் வலுவிழக்கும் என்று தெரிவிக்கப்பட்டுள்ளது.
இந்த புயல் காரணமாக அந்தமான் கடல் மற்றும் கிழக்கு மத்திய மற்றும் தென்கிழக்கு வங்கக்கடல் பகுதியில் கடல் கொந்தளிப்புடன் காணப்படும், அலைகள் பல மீட்டர் உயரத்துக்கு எழும்பும். எனவே மீனவர்கள் இந்த கடல் பகுதிக்கு மீன் பிடிக்கச் செல்ல வேண்டாம் என்று எச்சரிக்கை விடுக்கப்பட்டுள்ளது. #CyclonePabuk

சென்னை:

சென்னையை நோக்கி கடந்த வாரம் வந்த பெய்ட்டி புயல் ஆந்திரா பக்கம் சென்று விட்டதால் சென்னை மற்றும் வட தமிழகத்தில் மழை இல்லை. கடந்த சில நாட்களாக வறண்ட வானிலை நிலவுகிறது.

தற்போது தென்மேற்கு வங்கக்கடல் மற்றும் அதையொட்டிய இந்தியப் பெருங்கடல் பகுதியில் வளிமண்டலத்தில் மேலடுக்கு சுழற்சி நிலவுகிறது. அது குறைந்த காற்றழுத்த தாழ்வு நிலையாக மாறி உள்ளது.


இதன் காரணமாக தென் மாவட்டங்களில் இன்றும் நாளையும், பரவலாக மழை பெய்யும் என்றும் ஒரு சில இடங்களில் பலத்த மழை பெய்யும் என்றும் இந்திய வானிலை மையம் தெரிவித்து உள்ளது.

சென்னையில் வானம் மேக மூட்டத்துடன் காணப்படும் ஒரு சில நேரங்களில் லேசான மழை பெய்யும் வாய்ப்பு உள்ளதாக சென்னை வானிலை மையம் தெரிவித்துள்ளது. #IndiaMeteorologicalDepartment #HeavyRainfall

சென்னை:

இந்தியப்பெருங்கடலை ஒட்டியுள்ள தெற்கு வங்கக் கடலின் மத்திய பகுதியில் குறைந்த காற்றழுத்த தாழ்வுப்பகுதி உருவாகி உள்ளது.

இது அடுத்த 24 மணி நேரத்தில் ஆழ்ந்த காற்றழுத்த மண்டலமாக (புயலாக) மாறி வடமேற்கு திசையில் நகர்ந்து வட தமிழகம் மற்றும் தெற்கு ஆந்திரா நோக்கி நகரக்கூடும் என்று இந்திய வானிலை மையம் தெரிவித்து உள்ளது.

14-ந்தேதி மாலை வட தமிழக கடற்கரையோர பகுதியை நெருங்கும் இந்தப் புயல் 15-ந்தேதி காலை முதல் சென்னை அருகே மையம் கொள்ளும். அதன்பிறகு வடக்கு திசையில் நகர்ந்து 16-ந்தேதி இரவு அல்லது நள்ளிரவில் வலு இழந்து ஆந்திராவின் நெல்லூருக்கும், விசாகப்பட்டினத்துக்கும் இடையே கடக்கும் என்று கணிக்கப்பட்டுள்ளது.


புயல் 15-ந்தேதி காலை முதல் இரவு வரை சென்னை அருகே நாள் முழுவதும் மையம் கொண்டு இருக்கும் என்றும் இதனால் வட தமிழகத்தில் 13-ந்தேதி தொடங்கும் மழை 14-ந்தேதியும், 15-ந்தேதியும் வலுவான காற்றுடன் பலத்த மழை பெய்யும் வாய்ப்பு உள்ளது.

புயல் முதலில் சென்னைக்கும், புதுவைக்கும் இடையே மையம்கொள்ளும் என்று கணிக்கப்பட்டு இருந்தது. ஆனால் இன்று காலை நிலவரப்படி சென்னைக்கும் விசாகப்பட்டினத்துக்கும் இடையே செல்லும் வாய்ப்பு உள்ளதாக கணிக்கப்படுகிறது.

தென்மேற்கு வங்க கடல் மற்றும் இந்தியப்பெருங்கடலில் மணிக்கு 60 கி.மீ வேகத்தில் காற்றுவீசும் என்பதால் மீனவர்கள் மீன் பிடிக்க செல்ல வேண்டாம் என்று இந்திய வானிலை மையம் எச்சரிக்கை விடுத்து உள்ளது.

15-ந்தேதி முதல் 17-ந்தேதி வரை சென்னை மற்றும் வட தமிழகத்தில் மிதமிஞ்சிய கனமழை பெய்யும் என்றும் எச்சரிக்கை விடுக்கப்பட்டு உள்ளது.  #IMD #TNRain #Chennaicyclone

சென்னை:

தென் கிழக்கு வங்க கடலில் கடந்த வாரம் நிலை கொண்டிருந்த குறைந்த காற்றழுத்த தாழ்வு நிலை வடகடலோர மாவட்டங்கள் வழியாக தரைப்பகுதியை கடந்து கேரளா சென்று விட்டது.

இதனால் சென்னை மற்றும் வட கடலோர மாவட்டங்களிலும் டெல்டா மாவட்டங்களிலும் பரவலாக மழை பெய்தது.

இந்த நிலையில் நேற்று இரவு தென் கிழக்கு வங்க கடல் மற்றும் அதையொட்டிய இந்தியப் பெருங்கடல் பகுதியில் புதிதாக குறைந்த காற்றழுத்த தாழ்வு நிலை உருவாகியுள்ளது. இதன் காரணமாக தமிழகத்தில் வடகிழக்கு பருவ மழை நீடிக்கும் வாய்ப்பு உள்ளது.

இதற்கிடையே குமரிக் கடல் மற்றும் தென் கிழக்கு அரபிக் கடலில் மேலடுக்கு சுழற்சி மற்றும் குறைந்த காற்றழுத்த தாழ்வு நிலை நிலவுகிறது.

இதன் காரணமாக தென் தமிழகத்தில் அடுத்த 2 நாட்களுக்கு மிதமான மழையும் ஒரு சில இடங்களில் பலத்த மழையும் பெய்யும் என்று இந்திய வானிலை மையம் தெரிவித்துள்ளது. தென் கிழக்கு அரபிக்கடல் மற்றும் குமரி கடல் பகுதிக்கும் தென் கிழக்கு வங்க கடல் பகுதிக்கும் மீனவர்கள் மீன் பிடிக்கச் செல்ல வேண்டாம் என்று எச்சரிக்கை விடுக்கப்பட்டு உள்ளது. #IMD #TNRains

சென்னை:

வங்கக்கடலில் மேலடுக்கு சுழற்சிகள் மற்றும் குறைந்த காற்றழுத்த தாழ்வு நிலை காரணமாக தமிழகத்தில் வடகிழக்கு பருவ மழை மீண்டும் தீவிரம் அடைந்துள்ளது.

நேற்று குமரி முதல் தெற்கு ஆந்திரா வரையிலான தமிழக கடலோர பகுதியில் குறைந்த காற்றழுத்த தாழ்வு நிலை நிலவுவதால் தமிழகம் புதுவையில் பரவலாக மிதமான மழை பெய்து வருகி றது. இந்த காற்றழுத்த தாழ்வு பகுதி தரையின் உள் பகுதிக்கு நகர்ந்து சென்று விட்டது.


இதற்கிடையே தென்கிழக்கு வங்கக்கடலில் அடுத்தடுத்து 2 காற்றழுத்த தாழ்வு பகுதிகள் உருவாகிறது. முதலாவது காற்றழுத்த தாழ்வுப் பகுதியானது தென்கிழக்கு வங்கக்கடல் மற்றும் அதனையொட்டிய இந்தியப் பெருங்கடல் பகுதியில் நாளை (6-ந்தேதி) உருவாகிறது.

இதன் காரணமாக நாளை முதல் தமிழகம் மற்றும் புதுவையில் கடலோர மாவட்டங்களில் மீண்டும் பரவலாக மழை பெய்யும். ஒரு சில இடங்களில் கன மழை பெய்யும் என்று இந்திய வானிலை மையம் தெரிவித்துள்ளது.

அடுத்து தென்கிழக்கு வங்கக்கடலில் மற்றொரு குறைந்த காற்றழுத்த தாழ்வு பகுதி 9-ந்தேதி உருவாகிறது.

முதலாவது காற்றழுத்த தாழ்வுப் பகுதி உருவாகும் பகுதியையொட்டியே 2-வது காற்றழுத்த தாழ்வு பகுதியும் உருவாகிறது. இரண்டும் தென்கிழக்கு வங்கக்கடலில் அருகருகே நிலைகொண்டு இருக்கும். இதன் காரணமாக தமிழகம் மற்றும் புதுவையில் தொடர்ந்து மழையை எதிர்பார்க்கலாம் என்று இந்திய வானிலை மையம் அறிவித்துள்ளது.

தற்போது குமரி கடல் முதல் மேற்கு மத்திய வங்கக்கடல் வரையிலும், மன்னார் வளைகுடா முதல் தமிழக கடலோரத்தையொட்டிய தென்மேற்கு வங்கக்கடல் வரை மேலடுக்கு சுழற்சி நிலவுகிறது. இதன் காரணமாக அடுத்த 24 மணி நேரத்துக்கு தென் தமிழகத்தின் கடலோர மாவட்டங்களில் மிதமானது முதல் கன மழை வரை பெய்யும் என்று எச்சரிக்கை விடுக்கப்பட்டுள்ளது. #IMD #Rain #Bayofbengal

சென்னை:

தமிழக கடலோரப் பகுதியில் நிலவிய மேலடுக்கு சுழற்சி தென்கிழக்கு அரபிக்கடல் மற்றும் அதனையொட்டிய இந்தியப் பெருங்கடல் பகுதியில் பரவி உள்ளது.

இதனால் டெல்டா மாவட்டங்கள் மற்றும் தென் தமிழகத்தில் பரவலாக மழை பெய்து வருகிறது. ஆனால் வட மாவட்டங்களில் தொடர்ந்து வறண்ட வானிலையே காணப்படுகிறது.

இதன் காரணமாக வருகிற 4-ந்தேதி முதல் தெற்கு ஆந்திரா மற்றும் வட தமிழகத்தில் பலத்த மழைக்கு வாய்ப்பு இருப்பதாக இந்திய வானிலை மையம் தெரிவித்துள்ளது. இப்போதைக்கு 4, 5-ந்தேதிகளுக்கு மட்டும் வடதமிழகத்துக்கு பெரும்பாலான பகுதிகளுக்கு பலத்த மழை எச்சரிக்கை விடுக்கப்பட்டுள்ளது.

11 செ.மீ. அளவில் மழை பெய்யும் வாய்ப்பு இருப்பதாகவும் தெரிவிக்கப்பட்டுள்ளது. இந்த காற்றழுத்த தாழ்வு, குறைந்த காற்றழுத்த பகுதியாக உருவாகுமா? என்பதை வானிலை அதிகாரிகள் கணித்து வருகிறார்கள். அதன் பிறகே தொடர்ந்து மழை எச்சரிக்கை விடப்படும்.

இந்த மழையானது வட மாவட்டங்களில் நிலவும் பற்றாக்குறை மழை அளவை ஓரளவுக்கு ஈடுசெய்யும் வாய்ப்பு இருப்பதாக வானிலை அதிகாரிகள் தெரிவித்தனர். #IMD #TNRains

சென்னை:

வங்க கடலில் உருவான கஜா புயல் தமிழகத்தின் டெல்டா மாவட்டங்களில் கடுமையான சேதத்தை ஏற்படுத்தி அரபிக் கடலுக்கு சென்று விட்டது.

அதன் பிறகு தமிழகத்தின் மேல் பகுதியில் நிலவிய குறைந்த காற்றழுத்த தாழ்வு பகுதி மற்றும் மேலடுக்கு சுழற்சி காரணமாக பரவலான மழையும் ஒரு சில இடங்களில் கனமழையும் பெய்தது.

மழை படிப்படியாக குறைந்த நிலையில் கடந்த 2 நாட்களாக தமிழகம்-புதுவையில் வறண்ட வானிலை நிலவுகிறது. இது மேலும் 2 நாட்களுக்கு நீடிக்கும் என்று இந்திய வானிலை மையம் தெரிவித்துள்ளது.

இந்த நிலையில் வியட்நாம், தாய்லாந்தையொட்டியுள்ள சியாம் வளைகுடா பகுதியில் மேலடுக்கு சுழற்சி நிலவுகிறது. அது அந்தமான் கடல் பகுதிக்கு பரவிவருகிறது.

தொடர்ந்து மேற்கு திசை நோக்கி காற்று விசுவதால் அந்தமான் கடல் பகுதியில் 2 நாளில் மேலடுக்கு சுழற்சி உருவாகி வருகிற 29-ந்தேதி (வியாழக்கிழமை) தமிழக கடற்கரை பகுதி வரை பரவுகிறது.

இதனால் வடகிழக்கு பருவமழை தீவிரம் அடைவதற்கான சாதகமான சூழ்நிலை உருவாகிறது.

வடமாவட்டங்களில் மிதமாகவும், தென் மாவட்டங்களில் மிக பலத்த மழையும் பெய்யும். அதன் பிறகு டிசம்பர் முதல் வாரத்திலும் மழை நீடிக்கும் வாய்ப்பு உள்ளதாக தெரிவித்துள்ளது.

சென்னையை பொறுத்த வரை வடகிழக்கு பருவமழையானது சராசரி அளவைக் காட்டிலும் 47 சதவீதம் குறைவாகவே பெய்துள்ளது. சென்னையில் இந்த சீசனில் பெய்ய வேண்டிய சராசரி மழை அளவான 60 செ.மீ.க்கு பதில் 32 செ.மீ. மட்டுமே பெய்துள்ளதாக சென்னை வானிலை மைய இயக்குனர் பாலச்சந்திரன் தெரிவித்தார்.

வடகிழக்கு பருவமழை காலம் டிசம்பர் முடிய இருக்கிறது. இனிவரும் நாட்களில் மழை பெய்ய வாய்ப்பு உள்ளது. வானிலை நிலவரத்தை தொடர்ந்து கண்காணித்து வருகிறோம். இடைவெளிவிட்டு மீண்டும் மழை பெய்யும். தமிழகத்தின் மற்ற மாவட்டங்களை காட்டிலும் தர்மபுரி, கரூர், ராமநாதபுரம் மாவட்டங்களில் மழை குறைவாகவே பெய்துள்ளதாக அவர் மேலும் கூறினார்.

சென்னையில் நேற்று வானம் மேகமூட்டத்துடன் காணப்பட்டாலும் ஒரு சில நேரங்களில் வெப்பம் அதிகரித்து இருந்தது. அதிகபட்சமாக நுங்கம்பாக்கம் மற்றும் மீனம்பாக்கத்தில் 30.1 டிகிரி செல்சியஸ் வெப்பம் நிலவியது. நாளை வெப்பம் மேலும் அதிகரித்து 31டிகிரி செல்சியஸ் ஆக இருக்கும் என்று வானிலை மையம் தெரிவித்துள்ளது.  #IMD #TNRains

இந்நிலையில் இன்று காலை இந்திய வானிலை மையம், ‘‘கஜா புயல் 5 கிலோ மீட்டர் என குறைந்த வேகத்தில் நகர்கிறது. சென்னையில் இருந்து கிழக்கே 750 கிலோ மீட்டர் தொலைவிலும், நாகையில் இருந்து வடகிழக்கே 840 கிலோ மீட்டர் தொலைவில் புயல் மையம் கொண்டுள்ளது. மேற்கு - தென்மேற்கு நோக்கி நகரும் கஜா, 15-ந்தேதி அதிதீவிர புயலாக வலுப்பெற்று பாம்பன் - கடலூர் இடையே கரையை கடக்க வாய்ப்புள்ளது’’ என்று தெரிவித்துள்ளது.  #GajaCyclone #GajaStorm

சென்னை:

வடகிழக்கு பருவமழை அக்டோபர் 3-வது வாரத்தில் தொடங்கும். இந்த ஆண்டு வங்க கடலில் லுபான், டிட்லி என இரு புயல்கள் உருவானதால் பருவமழை தொடங்குவதில் தாமதம் ஏற்பட்டது.

தற்போது தென்மேற்கு வங்க கடலில் இலங்கை அருகே வளிமண்டல மேலடுக்கு சுழற்சியால் காற்றழுத்தம் உருவாகியுள்ளது. இதன் காரணமாக தமிழகத்தில் பரவலாக மழை பெய்து வருகிறது.

இதன் காரணமாக 1-ந்தேதி முதல் தமிழகத்தில் பருவமழை பெய்யும். கடலோர மாவட்டங்களில் மிதமான மழை பெய்யும் என்று அறிவிக்கப்பட்டுள்ளது.

தென்மேற்கு பருவ மழை இந்த மாதம் 21-ந் தேதி வரை நீடித்தது. தென்மேற்கு பருவமழை காலத்தில் தமிழகத்திலும் மழை பெய்தது. அக்டோபர் 1-ந்தேதி முதல் 29-ந்தேதி வரை தமிழகத்தில் 24 செ.மீ. மழை பெய்ய வேண்டும். ஆனால் 12 செ.மீ. மழைதான் பெய்துள்ளது. இது 50 சதவீதம் குறைவு.

புதுச்சேரியில் 17 செ.மீ.க்கு பதில் 16 செ.மீ. பெய்துள்ளது. இது 9 சதவீதம் குறைவு என்று வானிலை மையம் தெரிவித்துள்ளது. #NortheastMonsoon #IMD #TNRains

சென்னை:

வடகிழக்கு பருவமழை தொடங்க தாமதம் ஆகும் நிலையில் தற்போது மேற்கு மத்திய மற்றும் வடமேற்கு வங்க கடல் பகுதியில் குறைந்த காற்றழுத்த பகுதி உருவாகும் நிலை காணப்படுகிறது.

இது அடுத்த 48 மணிநேரத்தில் 29-ந்தேதி வாக்கில் குறைந்த காற்றழுத்த பகுதியாக மாறும் வாய்ப்பு உள்ளதாக இந்திய வானிலை மையம் தெரிவித்துள்ளது.

மேலும், அந்தமான் கடல் பகுதியில் வளிமண்டலத்தில் நிலவும் மேலடுக்கு சுழற்சி அதையொட்டியுள்ள பகுதிகளில் பரவி தமிழக கடலோரம் வரை பரவியுள்ளது.

இது வடகிழக்கு பருவமழை தொடங்குவதற்கான சாதகமான நிலை என்பதால் இன்னும் 4 நாளில் பருவமழைக்கான அறிகுறி தொடங்கும் என வானிலை மையம் தகவல் வெளியிட்டுள்ளது.

கடந்த 24 மணிநேரத்தில் அதிகபட்சமாக ராமேசுவரத்தில் 3 செ.மீ. மழை பெய்துள்ளது. பாம்பன், மயிலாடுதுறை, சீர்காழி ஆகிய இடங்களில் தலா 1 செ.மீ மழை பதிவாகியுள்ளது.

தமிழகத்தில் அடுத்த 24 மணிநேரத்தில் ஒரு சில இடங்களில் பரவலாக மழை பெய்யும். சென்னையில் வானம் மேகமூட்டத்துடன் காணப்படும். அதிகபட்ச வெப்பநிலை 35 டிகிரி செல்சியஸ் ஆக உயரும் என்று சென்னை வானிலை மையம் தெரிவித்துள்ளது. #IndianMeteorologicalCenter

திருவனந்தபுரம்:

கேரளாவில் கடந்த ஆகஸ்டு மாதம் பேய்மழை பெய்து மாநிலமே வெள்ளத்தில் மூழ்கியது.

செப்டம்பர் மாதம் மழை ஓய்ந்து கேரளாவில் இயல்பு நிலை திரும்பி வந்தது. இந்நிலையில் திடீரென அங்கு மீண்டும் மழை பெய்ய தொடங்கி உள்ளது.

கடந்த வாரம் இடுக்கி, பத்தனம்திட்டா, மலப்புரம் உள்பட 5 மாவட்டங்களில் கன மழை பெய்யும் என்று வானிலை ஆய்வு மையம் எச்சரித்தது. அதன்படி இந்த மாவட்டங்களில் பலத்த மழை கொட்டியது. இடுக்கியில் சில இடங்களில் நிலச்சரிவும் ஏற்பட்டது.
இதற்கிடையே அரபிக்கடலில் லட்சத்தீவு அருகே கடலில் குறைந்த காற்றழுத்த தாழ்வு உருவாகி உள்ளதாக இந்திய வானிலை ஆய்வு மையம் தெரிவித்து உள்ளது.

இந்த காற்றழுத்த தாழ்வு பகுதி வடமேற்கு திசையில் நகர்கிறது. இதனால் கேரளாவில் வருகிற 7 மற்றும் 8-ந் தேதிகளில் கடலில் சூறைக்காற்று வீசும் என்றும், மீனவர்கள் யாரும் கடலுக்கு செல்ல வேண்டாம் எனவும் வானிலை ஆய்வு மையம் எச்சரித்து உள்ளது.

அரபிக்கடலில் உருவாகி உள்ள காற்றழுத்த தாழ்வு நிலை காரணமாக கேரளாவில் மேலும் 5 நாட்களுக்கு கன மழை பெய்யும் என்று வானிலை ஆய்வு மையம் தெரிவித்துள்ளது.

குறிப்பாக இடுக்கி, பத்தினம்திட்டா மாவட்டங்களில் 7 முதல் 11 சென்டி மீட்டர் அளவுக்கு மழை பெய்ய வாய்ப்புள்ளதாகவும் எச்சரித்து உள்ளது.

இந்திய வானிலை ஆய்வு மைய எச்சரிக்கையை தொடர்ந்து கேரளாவில் பேரிடர் மீட்பு படையினர் மற்றும் வருவாய் துறையினர் தயார் நிலையில் இருக்கும் படி அறிவுறுத்தப்பட்டு உள்ளனர்.

குறிப்பாக இடுக்கி, பத்தினம்திட்டா ஆகிய இரண்டு மாவட்டங்களிலும் மஞ்சள் நிற எச்சரிக்கை விடுக்கப்பட்டு உள்ளது.  #KeralaRain